افغانستان و تاجیکستان پنج تفاهم‌نامه‌ی همکاری امضا کردند.
افغانستان و تاجیکستان پنج تفاهم‌نامه‌ی همکاری را در بخش‌های مختلف امضا کرده‌اند.
این تفاهم‌نامه‌ها در جریان سفر رییس‌جمهور اشرف غنی به تاجیکستان امضا شده است.
آقای غنی و امام‌علی رحمان، رییس‌جمهور تاجیکستان در هنگام امضای این تفاهم‌نامه‌ها حضور داشته‌اند.
در خبرنامه‌ی ارگ ریاست‌جمهوری آمده است که این تفاهم‌نامه‌ها در بخش‌های سیاسی، امنیتی، تجارتی، ترانزیتی، ترانسپورتی، انرژی و فرهنگی امضا شده است.
در خبرنامه همچنان گفته شده است که رییسان‌جمهور دو کشور اعلامیه‌ی مشترک نشست دوجانبه افغانستان و تاجیکستان را نیز امضا کرده‌اند.
رییس‌جمهور غنی صبح امروز (دوشنبه، ۹ حمل) در رأس یک هیأت بلندرتبه‌ی دولتی در یک سفر رسمی دو روزه به تاجیکستان رفت.
اشرف غنی و امام‌علی رحمان
هدف از سفر آقای غنی شرکت و سخنرانی در نهمین نشست وزیران خارجه‌ی قلب آسیا – روند استانبول گفته شده است.
این نشست قرار است فردا سه‌شنبه با حضور وزیران خارجه‌ی ۱۴ کشور و رییسان‌جمهور افغانستان و تاجیکستان برگزار شود. وزیران خارجه‌ی افغانستان و تاجیکستان به‌صورت مشترک ریاست این نشست را بر عهده خواهند داشت.
تقویت اجماع منطقه‌ای در مورد صلح افغانستان، توسعه‌ی همکاری‌های سیاسی، امنیتی و اقتصادی میان کشورهای منطقه از موضوعات اصلی بحث در این نشست خواهد بود.
