عبدالسلام حنفی، معاون دوم نخست‌وزیر گروه طالبان در رأس یک هیأت بلندرتبه‌ی این گروه به ازبیکستان سفر کرده است.
ذبیح‌الله مجاهد، سخن‌گوی و معین نشرات وزارت اطلاعات و فرهنگ طالبان در بیانیه‌ای گفته که این هیأت طالبان امروز «شنبه، ۲۴ میزان» به ازبیکستان رفته است. به گفته‌ی او، هیأت طالبان در شهر ترمذ ازبیکستان با سردار عمرزاکوف، معاون نخست‌وزیر این کشور دیدار و گفت‌وگو می‌کند.
در ترکیب این هیأت که عبدالسلام حنفی آن را رهبری می‌کند، رییس اداره‌ی امور طالبان، سرپرستان وزارت‌های تحصیلات عالی، هوانوردی، فواید عامه، تجارت، اقتصاد و صحت عامه‌ی این گروه شاملند.
رییس بانک مرکزی طالبان، نمایندگان بخش سکتور امنیتی این گروه و نمایندگان سکتورهای خصوصی نیز در ترکیب آن شاملند.
ذبیح‌الله مجاهد گفته است که این هیأت طالبان با هیأت ازبیکستانی به‌رهبری عمرزاکوف در مورد «مسایل تجاری، ترانزیتی، خط آهن، لین برق ۵۰۰ کیلوولت و سایر موضوعات بحث‌وگو میشود.
سفر این هیأت طالبان یک روزه است.
