تاجیکستان به ارزش ۱.۵ میلیون دالر به زلزله‌زدگان هرات کمک ارسال کرده است
یک مقام تاجیکستانی می‌گوید که کاروان کمک‌های بشردوستانه‌ی آن کشور به آسیب‌دیدگان زمین‌لرزه در هرات وارد افغانستان شده و به‌زودی به آن ولایت خواهد رسید.
صاحب‌جا‌ن ضیاء‌الله، مسئول کمک‌های ارسالی تاجیکستان به آسیب‌دیدگان زمین‌لرزه‌ی هرات به روزنامه اطلاعات روز گفته است که این کمک‌ها امروز «چهارشنبه، ۲۶ میزان» از طریق «شیرخان‌بندر» ولایت قندوز وارد افغانستان شده است.
او افزوده که این کمک‌ها شامل مواد غذایی، کمپل، بستر خواب، آب آشامیدنی، وسایل آشپزخانه، مواد سوخت و مواد ساختمانی است که ارزش آن ۱۷ میلیون سامانی، معادل یک‌ونیم میلیون دالر است.
این مقام تاجیکستانی گفته است که این کمک‌ها به دستور امام‌علی رحمان، رییس‌جمهور آن کشور به آسیب‌دیدگان زمین‌لرزه‌ی هرات صورت می‌گیرد.
پس از زمین‌لرزه‌های ویرانگر ولایت هرات، شمار زیادی از کشورها اعلام کرده‌اند که به آسیب‌دیدگان کمک‌های اضطراری و بشردوستانه ارسال می‌کنند.
پیش از این ایران، ترکیه، چین، قزاقستان، اتحادیه اروپا و شماری از کشورهای دیگر به آسیب‌دیدگان زمین‌لرزه‌ی هرات کمک بشردوستانه ارسال کرده‌اند.
