پولیس مرزی تاجیکستان هفت شهروند افغانستان را به ظن قاچاق مواد مخدر به رگبار بستند
پولیس مرزی کشور تاجیکستان دست‌کم هفت شهروند کشور را به گلوله بستند که به‌صورت غیرقانونی وارد خاک آن کشور شده بودند.
این رویداد سه‌شنبه‌شب، ۲۱ حمل در نقطه مرزی افغانستان و تاجیکستان رخ داده است.
منابع تایید می‌کنند که رویداد پس از آن رخ داده که این افراد از طریق روستای مرزی نوآباد ولسوالی چاه‌آب تخار، وارد خاک تاجیکستان شده بودند.
منابع در تخار می‌گویند که این افراد مواد مخدر قاچاق می‌کردند.
افراد کشته شده، باشنده‌گان ولایت‌های تخار و بدخشان هستند و جسد دو تن آنان در ولسوالی چاه‌آب تخار به خاک سپرده شده است.
هویت افراد کشته شده هنوز مشخص نیست.
مسوولان محلی طالبان در تخار و طرف تاجیکستان نیز به‌گونه رسمی تا کنون در این مورد اظهار نظر نکرده‌اند.
ولسوالی‌های ماورای‌‌کوکچه شامل درقد، دشت قلعه، خواجه بهاوالدین، چاه‌آب و خواجه‌غار تخار در شمال‌شرقی کشور با تاجیکستان هم‌مرز هستند.
این در حالی است که دولت تاجیکستان همواره از انتقال مواد مخدر و «اعضای گروه‌های تروریستی» از افغانستان به خاک آن کشور ابراز نگرانی کرده است.
