کشورهای جرمنی، ناروی، اندونیزیا، اوزبیکستان و قطر از اعلان آتش‌بس استقبال نمودند

در نامهٔ مشترک که عنوانی دولت افغانستان از سوی وزارت‌های امور خارجه جرمنی، ناروی، اندونیزیا، اوزبیکستان و قطر مواصلت ورزیده است، در آن از اعلان آتش‌بس از سوی حکومت افغانستان و گروه طالبان در ایام عید، استقبال صورت گرفته است.

درنامه آمده است که اعلان آتش‌بس گام مثبت در راستای ختم جنگ و خشونت می‌باشد. نامه می‌افزاید: «ما از طرف‌ها می‌خواهیم تا در روزها و هفته های آینده گام‌هایی را بردارند که منتج به آغاز هرچه‌زودتر مذاکرات بین‌الافغانی گردد و‌ در نهایت سبب ختم بحران و تامین صلح در افغانستان شود.»

نامه به درخواست سازمان ملل متحد مبنی بر آتش‌بس عمومی در سراسر جهان بخاطر شیوع ویروس کرنا، اشاره کرده، می‌افزاید که ما خواستار کاهش خشونت دائمی و همه‌جانبه می‌باشیم، تا در این شرایط دشوار به شهروندان افغان رسیدگی صورت گیرد.

کشورهای متذکره در نامه از پروسهٔ همه‌جانبه صلح در افغانستان اعلام حمایت نموده و ابراز آمادگی برای همکاری به خواست طرف‌ها، نموده اند.

نامه همچنان، از تلاش‌های دوامدار همه طرف های حامی پروسهٔ صلح افغانستان، به خصوص ایالات متحده امریکا و قطر، ستایش کرده است.