وزیر امور خارجه آلمان با سفر به اوزبیکستان، از مقام‌های این کشور خواسته است تا در زمینه انتقال شهروندان آلمانی، کارمندان محلی آلمان و نیز شهروندان آسیب‌پذیر افغانستان از این کشور، کمک کند.
به گزارش دویچه‌وله، هایکو ماس، وزیر امور خارجه آلمان، روز «دوشنبه، ۸ سنبله»، به پایتخت اوزبیکستان سفر کرده و از مقام‌های این کشور خواسته است تا در زمینه انتقال شهروندان آلمانی، همکاران محلی و افراد در معرض خطر از افغانستان با آلمان همکاری کند.
مقام‌های اوزبیکستانی نیز در این زمینه اعلام آماده‌گی کرده‌اند. به گزارش دویچه‌وله، در حال حاضر اوزبیکستان بیش‌تر پناهجویان افغان را از مرزش عبور می‌دهد.
با این حال، ماس تصریح کرده است که پس از پایان پروازهای نظامی برای انتقال، مرحله انتقال افراد از افغانستان یک مسوولیت دشوار خواهد بود، چون در این مرحله انتقال زمینی است.
وزیر خارجه آلمان هنگام سفر از اوزبیکستان به تاجیکستان گفته است که تلاش‌ها برای کشانیدن همه همسایه‌گان افغانستان به میز مذاکره در راستای تخلیه گروه‌های مورد نظر از افغانستان جریان دارد.
