تاجیکستان صادرات برق به افغانستان را کاهش داده است.

شرکت برشنا اعلام کرد که تاجیکستان صادرات برق خود را به افغانستان کاهش داده است. طبق اعلام شرکت برشنا، صادرات برق تاجیکستان از ساعت ۷:۳۰ بامداد روز دوشنبه، ششم اسد، از ۳۵۰ میگاوات به ۴۰ میگاوات کاهش یافته است.

وحیدالله توحیدی، سخنگوی شرکت برشنا گفت که  صادرات برق تاجیکستان به دلیل «معاذیر داخلی و کم‌بود آب» کاهش یافته است.

توحیدی افزود که شرکت برشنا برای یافتن برق بدیل با اوزبیکستان وارد گفت‌وگو شده است.

به گفته توحیدی، در نتیجه این گفت‌وگوها، ۲۰۰ میگاوات انرژی برق از اوزبیکستان به شبکه ملی برق کشور وصل شده است.

به گفته او، در حال حاضر برای تأمین انرژی در پایتخت حدود ۳۰۰ میگاوات برق وجود دارد که ۱۰۰ میگاوات آن از منابع داخلی تأمین شده است.

سخنگوی شرکت برشنا می‌گوید که تلاش می‌شود تا ۲۰۰ میگاوات دیگر از برق وارداتی اوزبیکستان به کشور وصل شود.

وحیدالله توحیدی هرچند اذعان می‌کند که ممکن برق بخش‌هایی از کابل پایتخت قطع شده باشد، اما می‌گوید برق کابل در حال حاضر تأمین شده است.

شرکت برشنا از باشنده‌گان کابل خواسته است که در مصرف برق صرفه‌جویی کنند تا از کم‌بود برق جلوگیری شود.